koi jaise dariya pe pyasa nahin

koī jaise dariyā pe pyāsā nahīñ

kitābeñ to haiñ paḌhne vaalā nahīñ

ba-zāhir bahut tez hai raushnī

magar mere ghar meñ ujālā nahīñ

mujhe ye ḳhayāl aaj kyoñ aa gayā

kabhī apne baare meñ sochā nahīñ

sab ik dūsre se juḌe haiñ magar

kisī ko kisī par bharosā nahīñ

nigāhoñ pe haiñ aisī pābandiyāñ

ki apnī taraf dekh saktā nahīñ

bahut bhiiḌ hai lekin is bhiiḌ meñ

koī mujh ko chhū kar guzartā nahīñ

sadā dījiye dastakeñ dījiye

vo darvāza andar se khultā nahīñ

ise merī shohrat samajh lījiye

kisī ne mirā naam pūchhā nahīñ

samundar ko 'nazmī' burā kyoñ kaho

tumhārā safīna to Duubā nahīñ

koi jaise dariya pe pyasa nahin

kitaben to hain paDhne wala nahin

ba-zahir bahut tez hai raushni

magar mere ghar mein ujala nahin

mujhe ye KHayal aaj kyon aa gaya

kabhi apne bare mein socha nahin

sab ek dusre se juDe hain magar

kisi ko kisi par bharosa nahin

nigahon pe hain aisi pabandiyan

ki apni taraf dekh sakta nahin

bahut bhiD hai lekin is bhiD mein

koi mujh ko chhu kar guzarta nahin

sada dijiye dastaken dijiye

wo darwaza andar se khulta nahin

ise meri shohrat samajh lijiye

kisi ne mera nam puchha nahin

samundar ko 'nazmi' bura kyon kaho

tumhaara safina to Duba nahin