koi makin bhi na tha us makan se lauTa hun

koī makīñ bhī na thā us makāñ se lauTā huuñ

ḳhudā hī jāntā hai maiñ kahāñ se lauTā huuñ

hayāt guzrī thī kirdār jis ke gaḌhne meñ

zalīl ho ke usī dāstāñ se lauTā huuñ

na koī naqsh nazar meñ na dhuul kapḌoñ pe

samajh meñ kuchh nahīñ aatā kahāñ se lauTā huuñ

jahāñ pe aa ke mukammal hue vajūd tamām

adhūrā ho ki akelā vahāñ se lauTā huuñ

vo ḳhushbūeñ to mire taak meñ hī thiiñ raqsāñ

talāsh kar ki jinheñ gulsitāñ se lauTā huuñ

zamīn vāloñ zamīñ kī na dāstāñ pūchho

guzishta raat hī maiñ āsmāñ se lauTā huuñ

jahāñ pe 'fānī' ko faanī banāyā jaatā hai

maiñ ab ke baar usī āstāñ se lauTā huuñ

koi makin bhi na tha us makan se lauTa hun

KHuda hi jaanta hai main kahan se lauTa hun

hayat guzri thi kirdar jis ke gaDhne mein

zalil ho ke usi dastan se lauTa hun

na koi naqsh nazar mein na dhul kapDon pe

samajh mein kuchh nahin aata kahan se lauTa hun

jahan pe aa ke mukammal hue wajud tamam

adhura ho ki akela wahan se lauTa hun

wo KHushbuen to mere tak mein hi thin raqsan

talash kar ki jinhen gulsitan se lauTa hun

zamin walon zamin ki na dastan puchho

guzishta raat hi main aasman se lauTa hun

jahan pe 'fani' ko fani banaya jata hai

main ab ke bar usi aastan se lauTa hun