koi nahin aata samjhane

koī nahīñ aatā samjhāne

ab ārām se haiñ dīvāne

tai na hue dil ke vīrāne

thak kar baiTh ga.e dīvāne

majbūrī sab ko hotī hai

milnā ho to laakh bahāne

ban na sakī ahbāb se apnī

vo daanā the ham dīvāne

na.ī na.ī ummīdeñ aa kar

chheḌ rahī haiñ zaḳhm purāne

jalva-e-jānāñ kī tafsīreñ

ek haqīqat laakh fasāne

duniyā bhar kā dard sahā hai

ham ne tere ġham ke bahāne

phir vahshat aa.ī suljhāne

hosh o ḳhirad ke tāne-bāne

phir apne āñchal se havā dī

sho.ala-e-gul ko bād-e-sabā ne

phir vo Daal ga.e dāman meñ

dard kī daulat ġham ke ḳhazāne

aaj phir āñkhoñ meñ phirte haiñ

ahd-e-tamannā ke vīrāne

phir tanhā.ī pūchh rahī hai

kaun aa.e dil ko bahlāne

'saif' vo ġham bhī tishna-e-ḳhūñ hai

ham zinda haiñ jis ke bahāne

koi nahin aata samjhane

ab aaram se hain diwane

tai na hue dil ke virane

thak kar baiTh gae diwane

majburi sab ko hoti hai

milna ho to lakh bahane

ban na saki ahbab se apni

wo dana the hum diwane

nai nai ummiden aa kar

chheD rahi hain zaKHm purane

jalwa-e-jaanan ki tafsiren

ek haqiqat lakh fasane

duniya bhar ka dard saha hai

hum ne tere gham ke bahane

phir wahshat aai suljhane

hosh o KHirad ke tane-bane

phir apne aanchal se hawa di

shoala-e-gul ko baad-e-saba ne

phir wo Dal gae daman mein

dard ki daulat gham ke KHazane

aaj phir aankhon mein phirte hain

ahd-e-tamanna ke virane

phir tanhai puchh rahi hai

kaun aae dil ko bahlane

'saif' wo gham bhi tishna-e-KHun hai

hum zinda hain jis ke bahane