koi us se nahin kahta ki ye kya bewafai hai

koī us se nahīñ kahtā ki ye kyā bevafā.ī hai

churā kar dil mirā ab aañkh bhī apnī churā.ī hai

uTho ai mai-kasho ābād mai-ḳhāna kareñ chal kar

zarā dekho to kyā kaalī ghaTā ghanghor chhā.ī hai

butoñ ke ishq se ham baaz aa.e haiñ na ā.eñge

nahīñ parvā hameñ dushman agar saarī ḳhudā.ī hai

nashāt-e-dil ko dushman ke banā.eñge usī se ham

vo kahte haiñ tirī āh-e-rasā terā havā.ī hai

bigaḌ kar ġhair se tum aa.e ho ham ye samajhte haiñ

hamāre sāmne be-vaj.h kyuuñ sūrat banā.ī hai

har ik mushkil se mushkil kaam bantā hai banāne se

magar bigḌī huī qismat kisī ne kab banā.ī hai

ḳhabar sun kar mire marne kī vo kahne lage hañs kar

kisī dushman ne shāyad ye ḳhabar jhūTī uḌaa.ī hai

guloñ ko naġhma-e-bulbul sunā.ī tak nahīñ detā

tire dīvānoñ ne vo dhuum gulshan meñ machā.ī hai

dil-e-āshiq meñ ho ai 'mashriqī' gar jazb-e-dil kāmil

vo but phir kyuuñ na maa.il ho koī ghar kī ḳhudā.ī hai

koi us se nahin kahta ki ye kya bewafai hai

chura kar dil mera ab aankh bhi apni churai hai

uTho ai mai-kasho aabaad mai-KHana karen chal kar

zara dekho to kya kali ghaTa ghanghor chhai hai

buton ke ishq se hum baz aae hain na aaenge

nahin parwa hamein dushman agar sari KHudai hai

nashat-e-dil ko dushman ke banaenge usi se hum

wo kahte hain teri aah-e-rasa tera hawai hai

bigaD kar ghair se tum aae ho hum ye samajhte hain

hamare samne be-wajh kyun surat banai hai

har ek mushkil se mushkil kaam banta hai banane se

magar bigDi hui qismat kisi ne kab banai hai

KHabar sun kar mere marne ki wo kahne lage hans kar

kisi dushman ne shayad ye KHabar jhuTi uDai hai

gulon ko naghma-e-bulbul sunai tak nahin deta

tere diwanon ne wo dhum gulshan mein machai hai

dil-e-ashiq mein ho ai 'mashriqi' gar jazb-e-dil kaamil

wo but phir kyun na mail ho koi ghar ki KHudai hai