kuchh ab ki bar to aisa biphar gaya pani

kuchh ab kī baar to aisā biphar gayā paanī

bahā ke le gayā har shai jidhar gayā paanī

ye alamiya bhī ajab hai ki dasht se dariyā

palaT ke pūchh rahā hai kidhar gayā paanī

kisī bhī nal meñ nahīñ koī ek buuñd magar

har ik makān ke kamroñ meñ bhar gayā paanī

dhanak ke rang ubhar aa.e qatre qatre meñ

tumhāre jism ko chhū kar nikhar gayā paanī

hai aam shahr meñ dastūr be-hijābī kā

har ek shaḳhs kī āñkhoñ kā mar gayā paanī

maiñ tishna-baḳht use haath bhī lagā na sakā

mire qarīb se ho ke guzar gayā paanī

kisī badan meñ hunar ziist kā nahīñ 'āsim'

huā bhī kyā jo saroñ se utar gayā paanī

kuchh ab ki bar to aisa biphar gaya pani

baha ke le gaya har shai jidhar gaya pani

ye alamiya bhi ajab hai ki dasht se dariya

palaT ke puchh raha hai kidhar gaya pani

kisi bhi nal mein nahin koi ek bund magar

har ek makan ke kamron mein bhar gaya pani

dhanak ke rang ubhar aae qatre qatre mein

tumhaare jism ko chhu kar nikhar gaya pani

hai aam shahr mein dastur be-hijabi ka

har ek shaKHs ki aankhon ka mar gaya pani

main tishna-baKHt use hath bhi laga na saka

mere qarib se ho ke guzar gaya pani

kisi badan mein hunar zist ka nahin 'asim'

hua bhi kya jo saron se utar gaya pani