kuchh buri baat nahin sahab-e-iman hona

kuchh burī baat nahīñ sāhab-e-īmāñ honā

agar īmān se matlūb ho insāñ honā

barg-hā-e-gul-e-tar kā ye pareshāñ honā

jurm hai gul-kada-e-dahr meñ ḳhandāñ honā

jab kisī ġhunche ko khilte hue dekhā maiñ ne

aa gayā yaad vahīñ dil kā pareshāñ honā

ho gayā merī pareshāñ-nazarī kā baa.is

jalva-e-husn kā har samt farāvāñ honā

ahl-e-vahshat kā Thikānā bhī kahīñ to hotā

nahīñ be-sarfa bayābāñ kā bayābāñ honā

dam ġham-e-ishq kā bharte hue naale karnā

aarzū dard kī aur tālib-e-darmāñ honā

bā.is-e-hairat-e-arbāb-e-suḳhan hai 'mahrūm'

ahd-e-pīrī meñ tumhārā ye ġhazal-ḳhvāñ honā

kuchh buri baat nahin sahab-e-iman hona

agar iman se matlub ho insan hona

barg-ha-e-gul-e-tar ka ye pareshan hona

jurm hai gul-kada-e-dahr mein KHandan hona

jab kisi ghunche ko khilte hue dekha main ne

aa gaya yaad wahin dil ka pareshan hona

ho gaya meri pareshan-nazari ka bais

jalwa-e-husn ka har samt farawan hona

ahl-e-wahshat ka Thikana bhi kahin to hota

nahin be-sarfa bayaban ka bayaban hona

dam gham-e-ishq ka bharte hue nale karna

aarzu dard ki aur talib-e-darman hona

bais-e-hairat-e-arbab-e-suKHan hai 'mahrum'

ahd-e-piri mein tumhaara ye ghazal-KHwan hona