kuchh khiDkiyon ne ab ke baDa hi maza diya

kuchh khiḌkiyoñ ne ab ke baḌā hī mazā diyā

jo zaḳhm bhī diyā vo na.e se nayā diyā

sad-āfrīñ ḳhizāñ ke musavvir sad-āfrīñ

be-barg-o-shāḳh peḌ kā saaya banā diyā

aayā thā āsmān kī tasḳhīr kā ḳhayāl

logoñ ne mujh ko andhe kuñveñ meñ girā diyā

bachchoñ ko le ke log gharoñ se nikal paḌe

sailāb kī ḳhabar ne diloñ ko hilā diyā

taptī zamīñ pe garm-e-safar dekh kar mujhe

sūraj ne merī raah meñ saaya bichhā diyā

ikkīsvīñ sadī ke taqāzoñ ne āḳhirash

ā.inda nasl ko mirā qaarī banā diyā

nashtar-zanī bahār ne 'be-dil' kuchh aisī kī

har shāḳh par lahū kā parinda biThā diyā

kuchh khiDkiyon ne ab ke baDa hi maza diya

jo zaKHm bhi diya wo nae se naya diya

sad-afrin KHizan ke musawwir sad-afrin

be-barg-o-shaKH peD ka saya bana diya

aaya tha aasman ki tasKHir ka KHayal

logon ne mujh ko andhe kunwen mein gira diya

bachchon ko le ke log gharon se nikal paDe

sailab ki KHabar ne dilon ko hila diya

tapti zamin pe garm-e-safar dekh kar mujhe

suraj ne meri rah mein saya bichha diya

ikkiswin sadi ke taqazon ne aaKHirash

aainda nasl ko mera qari bana diya

nashtar-zani bahaar ne 'be-dil' kuchh aisi ki

har shaKH par lahu ka parinda biTha diya