کچھ نہ کچھ بھول تو ہو جاتی ہے انسان جو ہیں

کچھ نہ کچھ بھول تو ہو جاتی ہے انسان جو ہیں

یاد وہ بھی نہیں آتا ہے پریشان جو ہیں

صرف اتنا کہ بڑی چیز ہے ملنا دل کا

ہم کوئی بات سمجھتے نہیں نادان جو ہیں

رونق شہر سے مایوس نہ ہو بانوئے شہر

خاک اڑانے کو ترے بے سر و سامان جو ہیں

خیر دنیا مری وحشت کے لئے تنگ سہی

اور یہ عرصۂ باطن میں بیابان جو ہیں

اے شب دربدری آنکھ میں روشن کیا ہے

کچھ ستارے کہ سر مطلع امکان جو ہیں

اگلے موسم میں ہماری کوئی پہچان تو ہو

ان کو محفوظ رکھیں تار گریبان جو ہیں

رات کی رات فقیروں کی بھی دل داری کر

دائم آباد زمیں ہم ترے مہمان جو ہیں