kuchh na puchho ru-ba-ru ja kar kisi ke kya hua

kuchh na pūchho rū-ba-rū jā kar kisī ke kyā huā

TikTikī bañdhne na paa.ī thī ki dil chaltā huā

le ga.ī dil ko kisī kī ik nigāh-e-avvalīñ

maiñ kisī ke husn par yak-bārgī shaidā huā

us lab-e-shīrīñ pe merā ek baar aayā jo naam

maiñ ye samjhā ḳhushtarī pahlū-e-qismat vā huā

hāl-e-hijrāñ pūchhte kyā ho ki sūrat dekh lo

saaf zāhir hai marīz-e-ġham gayā-guzrā huā

huuñ sarāpā majma-e-ummīd-o-yās o intizār

dhīre dhīre chal rahā hai yak-nafas ruktā huā

raah kyā sūjhe mujhe duniyā mirī tārīk hai

hai kisī zulf-e-siyah meñ dil mirā uljhā huā

aql kā thā pher apnī jo unheñ samjhā thā ġhair

vo to bilkul jān-e-jāñ haiñ raaz ye ifshā huā

tum mirī taqdīr meñ ho aur phir kyā chāhiye

kaun sā matlab rahā phir jo nahīñ puurā huā

mujh ko samjhāyā nahīñ nāseh udhar mat jā.iyo

phir kahoge ''luT ga.e ham, dil hamārā kyā huā''

ham to haiñ maddāh us ke ham ko sab manzūr hai

jo huā us ne kiyā, jo kuchh huā achchhā huā

un ko paane se ġharaz thī kuchh na thā duniyā se bair

mil ga.e vo ham ko duniyā hī meñ aur achchhā huā

āshiqī rahbar se sīkho sar karo manzil ba-ḳhair

us kā hai ye rāsta achchhī tarah dekhā huā

kuchh na puchho ru-ba-ru ja kar kisi ke kya hua

TikTiki bandhne na pai thi ki dil chalta hua

le gai dil ko kisi ki ek nigah-e-awwalin

main kisi ke husn par yak-bargi shaida hua

us lab-e-shirin pe mera ek bar aaya jo nam

main ye samjha KHushtari pahlu-e-qismat wa hua

haal-e-hijran puchhte kya ho ki surat dekh lo

saf zahir hai mariz-e-gham gaya-guzra hua

hun sarapa majma-e-ummid-o-yas o intizar

dhire dhire chal raha hai yak-nafas rukta hua

rah kya sujhe mujhe duniya meri tarik hai

hai kisi zulf-e-siyah mein dil mera uljha hua

aql ka tha pher apni jo unhen samjha tha ghair

wo to bilkul jaan-e-jaan hain raaz ye ifsha hua

tum meri taqdir mein ho aur phir kya chahiye

kaun sa matlab raha phir jo nahin pura hua

mujh ko samjhaya nahin naseh udhar mat jaiyo

phir kahoge luT gae ham, dil hamara kya hua

hum to hain maddah us ke hum ko sab manzur hai

jo hua us ne kiya, jo kuchh hua achchha hua

un ko pane se gharaz thi kuchh na tha duniya se bair

mil gae wo hum ko duniya hi mein aur achchha hua

aashiqi rahbar se sikho sar karo manzil ba-KHair

us ka hai ye rasta achchhi tarah dekha hua