kuchh samajh aaya na aaya maine socha hai use

kuchh samajh aayā na aayā maiñ ne sochā hai use

zehn par us ko utārā dil pe likkhā hai use

in dinoñ is shahr meñ ik fasl-e-ḳhūñ kā raqs hai

ham bahut be-bas hue haiñ, maiñ ne likkhā hai use

dhuup ne hañs kar kahā dekhā tujhe pighlā diyā

barf kyā kahtī nafāsat ne Duboyā hai use

baaġh meñ honā hī shāyad seb kī pahchān thī

ab ki vo bāzār meñ hai ab to biknā hai use

kal bhare bādal meñ kyā rañgoñ kā darvāza khulā

mujh ko kal tak thā ye da.avā maiñ ne samjhā hai use

ek shai jis ko umūman sirf dil kahte haiñ log

mar gayā hotā magar maiñ ne bachāyā hai use

karb dil kā mere lab par aa.egā 'manzūr' kyā

maiñ ne ḳhūn-e-dil se kāġhaz par utārā hai use

kuchh samajh aaya na aaya main ne socha hai use

zehn par us ko utara dil pe likkha hai use

in dinon is shahr mein ek fasl-e-KHun ka raqs hai

hum bahut be-bas hue hain, main ne likkha hai use

dhup ne hans kar kaha dekha tujhe pighla diya

barf kya kahti nafasat ne Duboya hai use

bagh mein hona hi shayad seb ki pahchan thi

ab ki wo bazar mein hai ab to bikna hai use

kal bhare baadal mein kya rangon ka darwaza khula

mujh ko kal tak tha ye dawa main ne samjha hai use

ek shai jis ko umuman sirf dil kahte hain log

mar gaya hota magar main ne bachaya hai use

karb dil ka mere lab par aaega 'manzur' kya

main ne KHun-e-dil se kaghaz par utara hai use