kya hasin raat hai is raat se Darte kyun ho

kyā hasīñ raat hai is raat se Darte kyuuñ ho

aa ga.e ho to mulāqāt se Darte kyuuñ ho

naam aatā hai mirā jab bhī kisī mahfil meñ

ye batāo ki savālāt se Darte kyuuñ ho

dil lubhāne ke bhī andāz huā karte haiñ

mast āñkhoñ ke ishārāt se Darte kyuuñ ho

ka.ī barsāt ke mausam haiñ mirī āñkhoñ meñ

aatī jaatī huī barsāt se Darte kyuuñ ho

log achchhoñ ko bhī duniyā meñ burā kahte haiñ

kyā kahegā koī is baat se Darte kyuuñ ho

zindagī miltī hai insān ko jiine ke liye

muskurāte raho sadmāt se Darte kyuuñ ho

zikr-e-māzī ke tasavvur se pareshāñ ho kar

zinda rahnā hai to hālāt se Darte kyuuñ ho

kya hasin raat hai is raat se Darte kyun ho

aa gae ho to mulaqat se Darte kyun ho

nam aata hai mera jab bhi kisi mahfil mein

ye batao ki sawalat se Darte kyun ho

dil lubhane ke bhi andaz hua karte hain

mast aankhon ke ishaaraat se Darte kyun ho

kai barsat ke mausam hain meri aankhon mein

aati jati hui barsat se Darte kyun ho

log achchhon ko bhi duniya mein bura kahte hain

kya kahega koi is baat se Darte kyun ho

zindagi milti hai insan ko jine ke liye

muskuraate raho sadmat se Darte kyun ho

zikr-e-mazi ke tasawwur se pareshan ho kar

zinda rahna hai to haalat se Darte kyun ho