kya jaaniye sayyad the haq aagah kahan tak

kyā jāniye sayyad the haq āgāh kahāñ tak

samjhe na ki sīdhī hai mirī raah kahāñ tak

mantiq bhī to ik chiiz hai ai qibla o kaaba

de saktī hai kaam aap kī vallāh kahāñ tak

aflāk to is ahd meñ sābit hue mādūm

ab kyā kahūñ jaatī hai mirī aah kahāñ tak

kuchh san.at o hirfat pe bhī lāzim hai tavajjoh

āḳhir ye government se tanḳhvāh kahāñ tak

marnā bhī zarūrī hai ḳhudā bhī hai koī chiiz

ai hirs ke bando havas-e-jāh kahāñ tak

tahsīn ke laa.eq tirā har sher hai 'akbar'

ahbāb kareñ bazm meñ ab vaah kahāñ tak

kya jaaniye sayyad the haq aagah kahan tak

samjhe na ki sidhi hai meri rah kahan tak

mantiq bhi to ek chiz hai ai qibla o kaba

de sakti hai kaam aap ki wallah kahan tak

aflak to is ahd mein sabit hue madum

ab kya kahun jati hai meri aah kahan tak

kuchh sanat o hirfat pe bhi lazim hai tawajjoh

aaKHir ye gowernment se tanKHwah kahan tak

marna bhi zaruri hai KHuda bhi hai koi chiz

ai hirs ke bando hawas-e-jah kahan tak

tahsin ke laeq tera har sher hai 'akbar'

ahbab karen bazm mein ab wah kahan tak