kya kahen kaise basar hijr ki raaten ki hain

kyā kaheñ kaise basar hijr kī rāteñ kī haiñ

'umr bhar chāñd se ik shaḳhs kī bāteñ kī haiñ

kab azānoñ se na ma'amūr thā ka.aba dil kā

kab faqīroñ ne qazā ishq-salāteñ kī haiñ

terī ḳhushbū se koī ḳhat na havā par likhā

ḳhushk kis dhuup ne phūloñ kī davāteñ kī haiñ

haar to khel kā hissa thī magar farq ye hai

maat se pahle hī tah ham ne bisāteñ kī haiñ

lauT jaate haiñ ye Takrā ke sar-e-sāhil se

muztarib zehnoñ ne kab paar furāteñ kī haiñ

Dolī uTThī na tahī-chashm sitāroñ kī 'najīb'

sub.h-e-namnāk ne ruḳhsat ye barāteñ kī haiñ

kya kahen kaise basar hijr ki raaten ki hain

'umr bhar chand se ek shaKHs ki baaten ki hain

kab azanon se na ma'amur tha kaba dil ka

kab faqiron ne qaza ishq-salaten ki hain

teri KHushbu se koi KHat na hawa par likha

KHushk kis dhup ne phulon ki dawaten ki hain

haar to khel ka hissa thi magar farq ye hai

mat se pahle hi tah hum ne bisaten ki hain

lauT jate hain ye Takra ke sar-e-sahil se

muztarib zehnon ne kab par furaaten ki hain

Doli uTThi na tahi-chashm sitaron ki 'najib'

subh-e-namnak ne ruKHsat ye baraaten ki hain