kya KHabar apne Thikane ki taraf lauT aae

kyā ḳhabar apne Thikāne kī taraf lauT aa.e

ḳhud-ba-ḳhud tiir nishāne kī taraf lauT aa.e

sañg lauT aa.e pahāḌoñ kī taraf āḳhir-kār

aa.ine ā.ina-ḳhāne kī taraf lauT aa.e

jab khulā un pe ki naqsha mire sandūq meñ hai

aur kuchh saañp ḳhazāne kī taraf lauT aa.e

raat badmast rahe sābit-o-sayyār ke saath

sub.h hote hī zamāne kī taraf lauT aa.e

gaarā tayyār hai aur chaak bhī maujūd hai ab

kūza-gar kuuza banāne kī taraf lauT aa.e

hijr ko jhelnā āsān kahāñ thā ai dil

ham mohabbat meñ bahāne kī taraf lauT aa.e

bhiik is shahr meñ milnā koī āsān nahīñ

ya.anī majbūr kamāne kī taraf lauT aa.e

aur phir dasht-e-tamannā meñ bhaTakte hue log

ārzū-mand Thikāne kī taraf lauT aa.e

apnā kirdār nibhāne kī tag-o-tāz meñ 'zeb'

ham kahānī se fasāne kī taraf lauT aa.e

kya KHabar apne Thikane ki taraf lauT aae

KHud-ba-KHud tir nishane ki taraf lauT aae

sang lauT aae pahaDon ki taraf aaKHir-kar

aaine aaina-KHane ki taraf lauT aae

jab khula un pe ki naqsha mere sanduq mein hai

aur kuchh sanp KHazane ki taraf lauT aae

raat badmast rahe sabit-o-sayyar ke sath

subh hote hi zamane ki taraf lauT aae

gara tayyar hai aur chaak bhi maujud hai ab

kuza-gar kuza banane ki taraf lauT aae

hijr ko jhelna aasan kahan tha ai dil

hum mohabbat mein bahane ki taraf lauT aae

bhik is shahr mein milna koi aasan nahin

yani majbur kamane ki taraf lauT aae

aur phir dasht-e-tamanna mein bhaTakte hue log

aarzu-mand Thikane ki taraf lauT aae

apna kirdar nibhane ki tag-o-taz mein 'zeb'

hum kahani se fasane ki taraf lauT aae