کیا خوب شکل تھی کہ بہت خوب تر بنی

کیا خوب شکل تھی کہ بہت خوب تر بنی

اک گل کو دیکھتے ہی گلستاں نظر بنی

ہم میں تو فاصلہ تھا مگر سائے مل گئے

تصویر اس وصال کی دیوار پر بنی

کوشش میں اک عجیب سی عجلت کا دخل ہے

میں بیج بو رہا تھا کہ خواہش ثمر بنی

بیٹھے تھے ایک بنچ پہ کچھ دیر پارک میں

اتنا سا واقعہ تھا مگر کیا خبر بنی

وہ عزم تھا کہ ہٹتی گئیں خود رکاوٹیں

وہ عشق تھا کہ راہ کی دیوار در بنی

ہم نے کیا ہے عشق بڑے اعتماد سے

ہم نے کبھی نہیں یہ کہا جان پر بنی

عاصمؔ زمیں نے ماں کی طرح کی ہے پرورش

برسوں میں ایک شاخ توانا شجر بنی