kya kuchh na kiya aur hain kya kuchh nahin karte

kyā kuchh na kiyā aur haiñ kyā kuchh nahīñ karte

kuchh karte haiñ aisā ba-ḳhudā kuchh nahīñ karte

apne maraz-e-ġham kā hakīm aur koī hai

ham aur tabīboñ kī davā kuchh nahīñ karte

mālūm nahīñ ham se hijāb un ko hai kaisā

auroñ se to vo sharm o hayā kuchh nahīñ karte

go karte haiñ zāhir ko safā ahl-e-kudūrat

par dil ko nahīñ karte safā kuchh nahīñ karte

vo dilbarī ab tak mirī kuchh karte haiñ lekin

tāsīr tire naale dilā kuchh nahīñ karte

dil ham ne diyā thā tujhe ummīd-e-vafā par

tum ham se nahīñ karte vafā kuchh nahīñ karte

karte haiñ vo is tarah 'zafar' dil pe jafā.eñ

zāhir meñ ye jaano ki jafā kuchh nahīñ karte

kya kuchh na kiya aur hain kya kuchh nahin karte

kuchh karte hain aisa ba-KHuda kuchh nahin karte

apne maraz-e-gham ka hakim aur koi hai

hum aur tabibon ki dawa kuchh nahin karte

malum nahin hum se hijab un ko hai kaisa

auron se to wo sharm o haya kuchh nahin karte

go karte hain zahir ko safa ahl-e-kudurat

par dil ko nahin karte safa kuchh nahin karte

wo dilbari ab tak meri kuchh karte hain lekin

tasir tere nale dila kuchh nahin karte

dil hum ne diya tha tujhe ummid-e-wafa par

tum hum se nahin karte wafa kuchh nahin karte

karte hain wo is tarah 'zafar' dil pe jafaen

zahir mein ye jaano ki jafa kuchh nahin karte