kya sath tera dun ki main ek mauj-e-hawa hun

kyā saath tirā duuñ ki maiñ ik mauj-e-havā huuñ

bas ek nafas arz-e-tamannā ko rukā huuñ

rahtā huuñ bagūloñ kī tarah raqs meñ be-tāb

ai ham-nafaso maiñ dil-e-sahrā se uThā huuñ

qatra huuñ maiñ dariyā meñ mujhe kuchh nahīñ ma.alūm

ham-rāh mire kaun hai maiñ kis se judā huuñ

ik lamha Thahar mujh ko bhī ham-rāh liye chal

ai laila-e-hastī tirā naqsh-e-kaf-e-pā huuñ

ai zabt-e-nazar de mire īmāñ kī gavāhī

tū hī to samajhtā hai ki maiñ kaun huuñ kyā huuñ

chāhe bhī to vo mujh se judā ho nahīñ saktā

vo hai mirī zanjīr to maiñ us kī sadā huuñ

maiñ arsh-nashīñ bhī huuñ tire ghar kā makīñ bhī

maiñ nik.hat-e-īmān huuñ maiñ bū-e-vafā huuñ

kya sath tera dun ki main ek mauj-e-hawa hun

bas ek nafas arz-e-tamanna ko ruka hun

rahta hun bagulon ki tarah raqs mein be-tab

ai ham-nafaso main dil-e-sahra se uTha hun

qatra hun main dariya mein mujhe kuchh nahin malum

ham-rah mere kaun hai main kis se juda hun

ek lamha Thahar mujh ko bhi ham-rah liye chal

ai laila-e-hasti tera naqsh-e-kaf-e-pa hun

ai zabt-e-nazar de mere iman ki gawahi

tu hi to samajhta hai ki main kaun hun kya hun

chahe bhi to wo mujh se juda ho nahin sakta

wo hai meri zanjir to main us ki sada hun

main arsh-nashin bhi hun tere ghar ka makin bhi

main nikhat-e-iman hun main bu-e-wafa hun