kya sunaen kisi ko haal apna

kyā sunā.eñ kisī ko haal apnā

apne dil meñ rahe malāl apnā

sharmsār-e-javāb ho na sakā

bas-ki ḳhuddār thā savāl apnā

kis ne dekhā nahīñ hai bād-e-urūj

sāya-e-charḳh meñ zavāl apnā

hasrat-e-dīd le chale ham to

aap dekhā kareñ jamāl apnā

pech-dar-pech gesu-e-mushkīñ

jā ke uljhā kahāñ ḳhayāl apnā

dil asīr-e-balā-e-zulf-e-darāz

mahv-e-fariyād baal baal apnā

maut aa.ī na iltijāoñ se

aur jiinā huā vabāl apnā

hai ye pur-dard dāstāñ 'mahrūm'

kyā sunā.eñ kisī ko haal apnā

kya sunaen kisi ko haal apna

apne dil mein rahe malal apna

sharmsar-e-jawab ho na saka

bas-ki KHuddar tha sawal apna

kis ne dekha nahin hai baad-e-uruj

saya-e-charKH mein zawal apna

hasrat-e-did le chale hum to

aap dekha karen jamal apna

pech-dar-pech gesu-e-mushkin

ja ke uljha kahan KHayal apna

dil asir-e-bala-e-zulf-e-daraaz

mahw-e-fariyaad baal baal apna

maut aai na iltijaon se

aur jina hua wabaal apna

hai ye pur-dard dastan 'mahrum'

kya sunaen kisi ko haal apna