kya zamin kya aasman kuchh bhi nahin

kyā zamīñ kyā āsmāñ kuchh bhī nahīñ

ham na hoñ to ye jahāñ kuchh bhī nahīñ

dīda-o-dil kī rifāqat ke baġhair

fasl-e-gul ho yā ḳhizāñ kuchh bhī nahīñ

pattharoñ meñ ham bhī patthar ho ga.e

ab ġham-e-sūd-o-ziyāñ kuchh bhī nahīñ

kyā qayāmat hai ki apne des meñ

e'tibār-e-jism-o-jāñ kuchh bhī nahīñ

kaise kaise sar-kashīda log the

jin kā ab nām-o-nishāñ kuchh bhī nahīñ

ek ehsās-e-mohabbat ke sivā

hāsil-e-umr-e-ravāñ kuchh bhī nahīñ

koī mauzū-e-suḳhan hī jab na ho

sirf andāz-e-bayāñ kuchh bhī nahīñ

kya zamin kya aasman kuchh bhi nahin

hum na hon to ye jahan kuchh bhi nahin

dida-o-dil ki rifaqat ke baghair

fasl-e-gul ho ya KHizan kuchh bhi nahin

pattharon mein hum bhi patthar ho gae

ab gham-e-sud-o-ziyan kuchh bhi nahin

kya qayamat hai ki apne des mein

e'tibar-e-jism-o-jaan kuchh bhi nahin

kaise kaise sar-kashida log the

jin ka ab nam-o-nishan kuchh bhi nahin

ek ehsas-e-mohabbat ke siwa

hasil-e-umr-e-rawan kuchh bhi nahin

koi mauzu-e-suKHan hi jab na ho

sirf andaz-e-bayan kuchh bhi nahin