kya zarurat be-zarurat dekhna

kyā zarūrat be-zarūrat dekhnā

tum na ā.īne kī sūrat dekhnā

phir ga.iiñ bīmār-e-ġham ko dekh kar

apnī āñkhoñ kī muravvat dekhnā

ham kahāñ ai dil kahāñ dīdār-e-yār

ho gayā terī badaulat dekhnā

hai vo jab dil meñ to kaisī justujū

DhūñDne vāloñ kī ġhaflat dekhnā

sāmne tārīf pīchhe gāliyāñ

un kī muñh dekhī mohabbat dekhnā

jin ko baaqī hī na ho ummīd kuchh

aise māyūsoñ kī hasrat dekhnā

mirā ḳhat ye kah ke ġhairoñ ko diyā

ik zarā is kī ibārat dekhnā

aur kuchh tum ko na aa.egā nazar

dil meñ rah kar dil kī hasrat dekhnā

sub.h uTh kar dekhnā 'ahsan' kā muñh

aise vaisoñ kī na sūrat dekhnā

kya zarurat be-zarurat dekhna

tum na aaine ki surat dekhna

phir gain bimar-e-gham ko dekh kar

apni aankhon ki murawwat dekhna

hum kahan ai dil kahan didar-e-yar

ho gaya teri badaulat dekhna

hai wo jab dil mein to kaisi justuju

DhunDne walon ki ghaflat dekhna

samne tarif pichhe galiyan

un ki munh dekhi mohabbat dekhna

jin ko baqi hi na ho ummid kuchh

aise mayuson ki hasrat dekhna

mera KHat ye kah ke ghairon ko diya

ek zara is ki ibarat dekhna

aur kuchh tum ko na aaega nazar

dil mein rah kar dil ki hasrat dekhna

subh uTh kar dekhna 'ahsan' ka munh

aise waison ki na surat dekhna