kyun mere lab pe wafaon ka sawal aa jae

kyuuñ mire lab pe vafāoñ kā savāl aa jaa.e

ain mumkin hai use ḳhud hī ḳhayāl aa jaa.e

hijr kī shaam bhī siine se lagā letā huuñ

kyā ḳhabar yūñhī kabhī shām-e-visāl aa jaa.e

ghar isī vāste jañgal meñ badal Daalā hai

shāyad aise hī idhar merā ġhazāl aa jaa.e

dhanak ubhre sar-e-aflāk kaḌī dhuup meñ bhī

dasht-e-vahshat meñ agar terā ḳhayāl aa jaa.e

koī to uḌ ke dahaktā huā sūraj Dhāñpe

gard hī sar pe ghaTāoñ kī misāl aa jaa.e

chhoḌ de vo mujhe taklīf meñ mumkin to nahīñ

aur agar aisī kabhī sūrat-e-hāl aa jaa.e

us ghaḌī pūchhūñgā tujh se ye jahāñ kaisā hai

jab tire husn pe thoḌā sā zavāl aa jaa.e

kuchh nahīñ hai to bhulānā hī use siikh 'adīm'

zindagī meñ tujhe koī to kamāl aa jaa.e

kyun mere lab pe wafaon ka sawal aa jae

ain mumkin hai use KHud hi KHayal aa jae

hijr ki sham bhi sine se laga leta hun

kya KHabar yunhi kabhi sham-e-visal aa jae

ghar isi waste jangal mein badal Dala hai

shayad aise hi idhar mera ghazal aa jae

dhanak ubhre sar-e-aflak kaDi dhup mein bhi

dasht-e-wahshat mein agar tera KHayal aa jae

koi to uD ke dahakta hua suraj Dhanpe

gard hi sar pe ghaTaon ki misal aa jae

chhoD de wo mujhe taklif mein mumkin to nahin

aur agar aisi kabhi surat-e-haal aa jae

us ghaDi puchhunga tujh se ye jahan kaisa hai

jab tere husn pe thoDa sa zawal aa jae

kuchh nahin hai to bhulana hi use sikh 'adim'

zindagi mein tujhe koi to kamal aa jae