kyun tere gesu kun gesu bolnan

kyuuñ tire gesū kuuñ gesū bolnāñ

dil meñ aatā hai ki shabbū bolnāñ

pech khā kar dil mirā chakrat meñ hai

zulf kuuñ terī chakābū bolnāñ

bhuul ga.ī aahū kuuñ apnī chaukḌī

tujh nigah kuuñ dām-e-āhū bolnāñ

yā falak kī aarsī meñ hai hilāl

yā kisī kā aks-e-abrū bolnāñ

siikh ga.ī gulshan meñ tere qad satī

sarv par qumrī ne kū kū bolnāñ

kaan meñ hai tere motī āb-dār

yā kisī āshiq kā aañsū bolnāñ

sāmne us chehra-e-gulfām ke

har gul-e-ḳhushbū kuuñ ḳhud-rav bolnāñ

husn ke lashkar ke rāvat haiñ do-chashm

zulf-o-lab shab-ḳhūñ kā qaabū bolnāñ

ab charāġh-e-aql gul karnī 'sirāj'

soz-e-dil señ ek yaahū bolnāñ

kyun tere gesu kun gesu bolnan

dil mein aata hai ki shabbu bolnan

pech kha kar dil mera chakrat mein hai

zulf kun teri chakabu bolnan

bhul gai aahu kun apni chaukDi

tujh nigah kun dam-e-ahu bolnan

ya falak ki aarsi mein hai hilal

ya kisi ka aks-e-abru bolnan

sikh gai gulshan mein tere qad sati

sarw par qumri ne ku ku bolnan

kan mein hai tere moti aab-dar

ya kisi aashiq ka aansu bolnan

samne us chehra-e-gulfam ke

har gul-e-KHushbu kun KHud-raw bolnan

husn ke lashkar ke rawat hain do-chashm

zulf-o-lab shab-KHun ka qabu bolnan

ab charagh-e-aql gul karni 'siraj'

soz-e-dil sen ek yahu bolnan