lai bahaar shauq ke saman nae nae

laa.ī bahār shauq ke sāmāñ na.e na.e

duniyā na.ī na.ī sī dil o jaañ na.e na.e

saaqī kī ik nigāh ne baḳhshī hayāt-e-nau

dil meñ machal ga.e mire armāñ na.e na.e

har aan tarz-e-nau se satā.e hai āsmāñ

mere liye sitam ke haiñ unvāñ na.e na.e

barbādiyoñ kā apne nasheman kī ġham nahīñ

tāmīr ho rahe haiñ gulistāñ na.e na.e

fasl-e-bahār aa.ī mubārak ho ai junūñ

dāman na.e na.e haiñ garebāñ na.e na.e

us chashm-e-nīm-bāz kī vo kam-nigāhiyāñ

dil meñ utar ga.e mire paikāñ na.e na.e

masjid meñ bhī fasāna butoñ kā janāb-e-shaiḳh

shāyad hue haiñ aap musalmāñ na.e na.e

'mumtāz' ik charāġh-e-sar-e-rahguzar sahī

hoñge charāġh us se farozāñ na.e na.e

lai bahaar shauq ke saman nae nae

duniya nai nai si dil o jaan nae nae

saqi ki ek nigah ne baKHshi hayat-e-nau

dil mein machal gae mere arman nae nae

har aan tarz-e-nau se satae hai aasman

mere liye sitam ke hain unwan nae nae

barbaadiyon ka apne nasheman ki gham nahin

tamir ho rahe hain gulistan nae nae

fasl-e-bahaar aai mubarak ho ai junun

daman nae nae hain gareban nae nae

us chashm-e-nim-baz ki wo kam-nigahiyan

dil mein utar gae mere paikan nae nae

masjid mein bhi fasana buton ka janab-e-shaiKH

shayad hue hain aap musalman nae nae

'mumtaz' ek charagh-e-sar-e-rahguzar sahi

honge charagh us se farozan nae nae