lala-kari-e-mohabbat na rahi

lāla-kārī-e-mohabbat na rahī

ki lahū rone kī aadat na rahī

mar ga.iiñ ārzūeñ ghuT ghuT kar

dil meñ ab ek bhī hasrat na rahī

dil-e-afsurda ko kyā garmā.eñ

garmī-e-zauq-e-mohabbat na rahī

shaaq thī pahle-pahal to magar ab

be-dilī bā.is-e-vahshat na rahī

sahar-o-shām ke nazzāroñ meñ

vo sabāhat vo malāhat na rahī

dil pe hai daaġh ki ab zauq-añgez

shafaq-e-shām kī rangat na rahī

kabhī bahlātī thī dil ko aa kar

kyuuñ vo ummīd kī aadat na rahī

maut thī terī judā.ī ham ko

zahr khāne kī zarūrat na rahī

shā.irī naam thā ik hālat kā

ab vo 'mahrūm' kī hālat na rahī

lala-kari-e-mohabbat na rahi

ki lahu rone ki aadat na rahi

mar gain aarzuen ghuT ghuT kar

dil mein ab ek bhi hasrat na rahi

dil-e-afsurda ko kya garmaen

garmi-e-zauq-e-mohabbat na rahi

shaq thi pahle-pahal to magar ab

be-dili bais-e-wahshat na rahi

sahar-o-sham ke nazzaron mein

wo sabahat wo malahat na rahi

dil pe hai dagh ki ab zauq-angez

shafaq-e-sham ki rangat na rahi

kabhi bahlati thi dil ko aa kar

kyun wo ummid ki aadat na rahi

maut thi teri judai hum ko

zahr khane ki zarurat na rahi

shairi nam tha ek haalat ka

ab wo 'mahrum' ki haalat na rahi