lafzon ki sanglaKH silon mein samo diya

lafzoñ kī sañglāḳh siloñ meñ samo diyā

yāroñ ne fan ke phuul ko patthar meñ bo diyā

merī haqīqatoñ pe na tū hañs ki tujh ko bhī

jiddat ke shauq ne sar-e-sāhil Dubo diyā

Dastī hai ab bhī dil ko kisī kī ThiThaktī chaap

ik aabjū pe jaltā hai jab shaam ko diyā

kaisā ḳhayāl hai ye kahāñ kī hai tarz-e-fikr

aayā to vo lajā gayā bichhḌā to ro diyā

TuuTī jo gir ke jhiil ke darpan pe ik kiran

mauj-e-sabā ne ruuh meñ kāñTā chubho diyā

kal shab murī kī maal pe linTāT se pare

bārish ne us kā chāñd-sā paikar bhigo diyā

kaise kahūñ ki rut kī kaḌī rau se haar kar

jīvan ke is safar meñ tujhe maiñ ne kho diyā

lafzon ki sanglaKH silon mein samo diya

yaron ne fan ke phul ko patthar mein bo diya

meri haqiqaton pe na tu hans ki tujh ko bhi

jiddat ke shauq ne sar-e-sahil Dubo diya

Dasti hai ab bhi dil ko kisi ki ThiThakti chap

ek aabju pe jalta hai jab sham ko diya

kaisa KHayal hai ye kahan ki hai tarz-e-fikr

aaya to wo laja gaya bichhDa to ro diya

TuTi jo gir ke jhil ke darpan pe ek kiran

mauj-e-saba ne ruh mein kanTa chubho diya

kal shab muri ki mal pe linTaT se pare

barish ne us ka chand-sa paikar bhigo diya

kaise kahun ki rut ki kaDi rau se haar kar

jiwan ke is safar mein tujhe main ne kho diya