laga ke dil kabhi aansu bhi hum baha na sake

lagā ke dil kabhī aañsū bhī ham bahā na sake

lagī jo aag jigar meñ use bujhā na sake

kiyā za.iif tire qasd-e-justujū ne hameñ

ki tā-lahad bhī ham apne qadam se jā na sake

vo aaj bazm meñ tevar chaḌhā.e aa.e haiñ

ki hāl-e-dil koī apnā unheñ sunā na sake

azal se naam pe mere faroġh likkhā thā

vo mujh ko laakh miTāyā kiye miTā na sake

sulā ke qabr meñ dete ho thapkiyāñ sāhib

ki mujh ko shor-e-qayāmat bhī ab jagā na sake

hamārā daulat-e-duniyā ne sar buland kiyā

ki dar pe dost ke sajde ko sar jhukā na sake

hamāre dil meñ likhī thī magar tirī ulfat

ki ham jamāl-e-jahāñ se fareb khā na sake

burā ho rang-e-ruḳh-e-nā-murād kā 'ālī'

kisī kā raaz kaleje meñ ham chhupā na sake

laga ke dil kabhi aansu bhi hum baha na sake

lagi jo aag jigar mein use bujha na sake

kiya zaif tere qasd-e-justuju ne hamein

ki ta-lahad bhi hum apne qadam se ja na sake

wo aaj bazm mein tewar chaDhae aae hain

ki haal-e-dil koi apna unhen suna na sake

azal se nam pe mere farogh likkha tha

wo mujh ko lakh miTaya kiye miTa na sake

sula ke qabr mein dete ho thapkiyan sahib

ki mujh ko shor-e-qayamat bhi ab jaga na sake

hamara daulat-e-duniya ne sar buland kiya

ki dar pe dost ke sajde ko sar jhuka na sake

hamare dil mein likhi thi magar teri ulfat

ki hum jamal-e-jahan se fareb kha na sake

bura ho rang-e-ruKH-e-na-murad ka 'ali'

kisi ka raaz kaleje mein hum chhupa na sake