lage KHadang jab us nala-e-sahar ka sa

lage ḳhadañg jab us nāla-e-sahar kā sā

falak kā haal na ho kyā mire jigar kā sā

na jā.ūñgā kabhī jannat meñ maiñ na jā.ūñgā

agar na hovegā naqsha tumhāre ghar kā sā

kare na ḳhāna-ḳharābī tirī nadāmat-e-jaur

ki āb-e-sharm meñ hai josh chashm-e-tar kā sā

ye josh yaas to dekho ki apne qatl ke vaqt

duā-e-vasl na kī vaqt thā asar kā sā

lage un āñkhoñ se har-vaqt ai dil-e-sad-chāk

tirā na rutba huā kyuuñ shigāf-e-dar kā sā

zarā ho garmi-e-sohbat to ḳhaak kar de charḳh

mirā surūr hai gul-ḳhanda-e-sharar kā sā

ye nā-tavāñ huuñ ki huuñ aur nazar nahīñ aatā

mirā bhī haal huā terī hī kamar kā sā

junūn ke josh se begāna-vār haiñ ahbāb

hamārā haal vatan meñ huā safar kā sā

ḳhabar nahīñ ki use kyā huā par is dar par

nishān-e-pā nazar aatā hai nāma-bar kā sā

dil aise shoḳh ko 'momin' ne de diyā ki vo hai

muhib husain kā aur dil rakhe shimar kā sā

lage KHadang jab us nala-e-sahar ka sa

falak ka haal na ho kya mere jigar ka sa

na jaunga kabhi jannat mein main na jaunga

agar na howega naqsha tumhaare ghar ka sa

kare na KHana-KHarabi teri nadamat-e-jaur

ki aab-e-sharm mein hai josh chashm-e-tar ka sa

ye josh yas to dekho ki apne qatl ke waqt

dua-e-wasl na ki waqt tha asar ka sa

lage un aankhon se har-waqt ai dil-e-sad-chaak

tera na rutba hua kyun shigaf-e-dar ka sa

zara ho garmi-e-sohbat to KHak kar de charKH

mera surur hai gul-KHanda-e-sharar ka sa

ye na-tawan hun ki hun aur nazar nahin aata

mera bhi haal hua teri hi kamar ka sa

junun ke josh se begana-war hain ahbab

hamara haal watan mein hua safar ka sa

KHabar nahin ki use kya hua par is dar par

nishan-e-pa nazar aata hai nama-bar ka sa

dil aise shoKH ko 'momin' ne de diya ki wo hai

muhib husain ka aur dil rakhe shimar ka sa