lahu mein Duba hua chand be-lihaf bhi ho

lahū meñ Duubā huā chāñd be-lihāf bhī ho

badan meñ reñgte saa.e kā inkishāf bhī ho

ye band āñkhoñ meñ sapne kahāñ se aate haiñ

ridā-e-nīñd meñ shāyad koī shigāf bhī ho

kabhī-kabhār koī rut ho bhīgne vaalī

kabhī-kabhār ye chehre kī gard saaf bhī ho

milā hai zaḳhm to is zaḳhm ke bharam ke liye

mire laboñ pe tabassum kā ik ġhilāf bhī ho

maiñ apne aap meñ bedār rahnā chāhtā huuñ

kabhī kabhī koī sāzish mire ḳhilāf bhī ho

mire rafīq takalluf ke dā.ere se nikal

ki ittifāq meñ thoḌā sā iḳhtilāf bhī ho

ye kyā ki merī har ik baat mustanad ho jaa.e

maza to jab hai ki logoñ ko inhirāf bhī ho

lahu mein Duba hua chand be-lihaf bhi ho

badan mein rengte sae ka inkishaf bhi ho

ye band aankhon mein sapne kahan se aate hain

rida-e-nind mein shayad koi shigaf bhi ho

kabhi-kabhaar koi rut ho bhigne wali

kabhi-kabhaar ye chehre ki gard saf bhi ho

mila hai zaKHm to is zaKHm ke bharam ke liye

mere labon pe tabassum ka ek ghilaf bhi ho

main apne aap mein bedar rahna chahta hun

kabhi kabhi koi sazish mere KHilaf bhi ho

mere rafiq takalluf ke daere se nikal

ki ittifaq mein thoDa sa iKHtilaf bhi ho

ye kya ki meri har ek baat mustanad ho jae

maza to jab hai ki logon ko inhiraf bhi ho