lamha lamha ek nai sai-e-baqa karti hui

lamha lamha ik na.ī sa.ī-e-baqā kartī huī

kaT rahī hai zindagī ḳhud ko fanā kartī huī

terī chup hai yā mire andar machā kohrām hai

koī shai to hai zabāñ ko be-navā kartī huī

apne andar reza reza TuuT kar bikhrā huuñ maiñ

hai ye kyā shai chor dil kā aa.inā kartī huī

kisht-e-jāñ se din ko kaTtī hai na.e zaḳhmoñ kī fasl

raat aatī hai inheñ phir se harā kartī huī

mere hone se na hone kā sabab paidā huā

mujh ko hastī hī thī ḳhud mujh se judā kartī huī

maut to 'āzād' hai āzādiyoñ kā ik jahāñ

zindagī hai har nafas ḳhud ko rihā kartī huī

lamha lamha ek nai sai-e-baqa karti hui

kaT rahi hai zindagi KHud ko fana karti hui

teri chup hai ya mere andar macha kohram hai

koi shai to hai zaban ko be-nawa karti hui

apne andar reza reza TuT kar bikhra hun main

hai ye kya shai chor dil ka aaina karti hui

kisht-e-jaan se din ko kaTti hai nae zaKHmon ki fasl

raat aati hai inhen phir se hara karti hui

mere hone se na hone ka sabab paida hua

mujh ko hasti hi thi KHud mujh se juda karti hui

maut to 'azad' hai aazadiyon ka ek jahan

zindagi hai har nafas KHud ko riha karti hui