le gaya ghar se unhen ghair ke ghar ka tawiz

le gayā ghar se unheñ ġhair ke ghar kā ta.avīz

ham ne dekhā na sunā aise asar kā ta.avīz

de ke bū zulf kī rakh lo tah-mahram dil ko

ḳhvāb meñ phir na Daroge ye hai Dar kā ta.avīz

sadqe tere mujhe taskīn se taskīn huī

ḳhat tirā thā ki mire dard-e-jigar kā ta.avīz

ho mubārak tujhe āñkhoñ meñ samānā din-rāt

zeb-e-bāzū rahe har-vaqt nazar kā ta.avīz

rah gayā ġhair ke ghar jā.iye bhī lā.iye bhī

aap ke sar kī qasam aap ke sar kā ta.avīz

bāñdh le bahr-e-ḳhudā apne bhare baazū par

nazar-e-bad se bachā.egā nazar kā ta.avīz

ghar ga.e apne batā kar vo hameñ rāh-e-adam

vasl kī shab kī nishānī hai kamar kā ta.avīz

haath bhī aa.eñ to hai haath lagānā mushkil

sar-e-bāzū hai bañdhā ḳhaas asar kā ta.avīz

Dar se un ke bhare baazū ka.ī kāġhaz utre

haath thāmā thā shab-e-vasl ki sarkā ta.avīz

dil hai ab maañg ke āġhosh meñ din-rāt 'riyāz'

ye to sar chaḌh ke banā yaar ke sar kā ta.avīz

le gaya ghar se unhen ghair ke ghar ka tawiz

hum ne dekha na suna aise asar ka tawiz

de ke bu zulf ki rakh lo tah-mahram dil ko

KHwab mein phir na Daroge ye hai Dar ka tawiz

sadqe tere mujhe taskin se taskin hui

KHat tera tha ki mere dard-e-jigar ka tawiz

ho mubarak tujhe aankhon mein samana din-raat

zeb-e-bazu rahe har-waqt nazar ka tawiz

rah gaya ghair ke ghar jaiye bhi laiye bhi

aap ke sar ki qasam aap ke sar ka tawiz

bandh le bahr-e-KHuda apne bhare bazu par

nazar-e-bad se bachaega nazar ka tawiz

ghar gae apne bata kar wo hamein rah-e-adam

wasl ki shab ki nishani hai kamar ka tawiz

hath bhi aaen to hai hath lagana mushkil

sar-e-bazu hai bandha KHas asar ka tawiz

Dar se un ke bhare bazu kai kaghaz utre

hath thama tha shab-e-wasl ki sarka tawiz

dil hai ab mang ke aaghosh mein din-raat 'riyaz'

ye to sar chaDh ke bana yar ke sar ka tawiz