log muddat mein bana pate hain ghar

log muddat meñ banā paate haiñ ghar

zalzale aate haiñ gir jaate haiñ ghar

vo makānoñ ke makīñ haiñ Thiik hai

ḳhush nasīboñ ko hī mil paate haiñ ghar

maz.haboñ kī aaḌ le kar nafrateñ

phail jaatī haiñ to baT jaate haiñ ghar

jo haqīqat meñ ho ghar vo ghar kahāñ

ham ko jaanā hī hai so jaate haiñ ghar

har jagah ruknā munāsib hai kahāñ

yuuñ to raste meñ bahut aate haiñ ghar

ye makāñ thā is ko ghar samjhā kiye

kaise kaise ham ko bahkāte haiñ ghar

umr saarī rāstoñ meñ kaT ga.ī

vaqt ab aayā hai ab jaate haiñ ghar

ik zarā sā pyaar honā chāhiye

dil mileñ to ḳhud lipaT jaate haiñ ghar

umr 'hairat' dopahar kī dhuup thī

shaam ab aa.ī hai ab jaate haiñ ghar

log muddat mein bana pate hain ghar

zalzale aate hain gir jate hain ghar

wo makanon ke makin hain Thik hai

KHush nasibon ko hi mil pate hain ghar

mazhabon ki aaD le kar nafraten

phail jati hain to baT jate hain ghar

jo haqiqat mein ho ghar wo ghar kahan

hum ko jaana hi hai so jate hain ghar

har jagah rukna munasib hai kahan

yun to raste mein bahut aate hain ghar

ye makan tha is ko ghar samjha kiye

kaise kaise hum ko bahkate hain ghar

umr sari raston mein kaT gai

waqt ab aaya hai ab jate hain ghar

ek zara sa pyar hona chahiye

dil milen to KHud lipaT jate hain ghar

umr 'hairat' dopahar ki dhup thi

sham ab aai hai ab jate hain ghar