log sab qimti poshak pahan kar pahunche

log sab qīmtī poshāk pahan kar pahuñche

aur ham jāma-e-sad-chāk pahan kar pahuñche

motiyoñ vaalī qabā vaale ḳhudā ke ghar tak

jism par pairāhan-e-ḳhāk pahan kar pahuñche

pāgaloñ jañg bagūloñ se chhiḌī thī aur tum

apne tan par ḳhas-o-ḳhāshāk pahan kar pahuñche

bazm-e-shādī ko na lag jaa.e burī koī nazar

is liye dāman-e-gam-nāk pahan kar pahuñche

haq-bayānī kā uThāyā thā jo zimma ham ne

is liye lahja-e-be-bāk pahan kar pahuñche

yuuñ to pahuñche the ḳhushī oḌh ke mahfil meñ tirī

ghar talak dīda-e-namnāk pahan kar pahuñche

ek din vo bhī nasheboñ meñ mileñge 'nāyāb'

arsh tak jo kabhī aflāk pahan kar pahuñche

log sab qimti poshak pahan kar pahunche

aur hum jama-e-sad-chaak pahan kar pahunche

motiyon wali qaba wale KHuda ke ghar tak

jism par pairahan-e-KHak pahan kar pahunche

pagalon jang bagulon se chhiDi thi aur tum

apne tan par KHas-o-KHashak pahan kar pahunche

bazm-e-shadi ko na lag jae buri koi nazar

is liye daman-e-gam-nak pahan kar pahunche

haq-bayani ka uThaya tha jo zimma hum ne

is liye lahja-e-be-bak pahan kar pahunche

yun to pahunche the KHushi oDh ke mahfil mein teri

ghar talak dida-e-namnak pahan kar pahunche

ek din wo bhi nashebon mein milenge 'nayab'

arsh tak jo kabhi aflak pahan kar pahunche