luT rahi hai daulat-e-didar qaisar-bagh mein

luT rahī hai daulat-e-dīdār qaisar-bāġh meñ

misl-e-gul sab ho ga.e zardār qaisar-bāġh meñ

dekhte haiñ yaar kā paḌhtā hai kalima kaun kaun

jam' haiñ sab kāfir-o-dīñdā qaisar-bāġh meñ

ham se aañkh us ne laḌā.ī tevrī badlī ġhair ne

chalte chalte rah ga.ī talvār qaisar-bāġh meñ

us kamāñ-abrū ne kiiñ dil par nazar-andāziyāñ

ham pe tīroñ kī huī bauchhār qaisar-bāġh meñ

gaate haiñ murġhān-e-gulshan peñg detī hai sadā

jabki jhūlā jhūltā hai yaar qaisar-bāġh meñ

be-ḳhudī chhā.ī huī hai ye sharāb-e-aish kī

mast do bāhar paḌe haiñ chaar qaisar-bāġh meñ

yaañ havā meñ hai dam-e-īsā kā 'ālam kyā 'ajab

paa.e sehat nargis-e-bīmār qaisar-bāġh meñ

maiñ to kyā hote haiñ gul bhī kushta-e-teġh-e-ḳhirām

bāñkī tirchhī chalte ho raftār qaisar-bāġh meñ

jalva-afgan nuur ke haiñ phuul phal tuubā kī tarf

ḳhuld se mañgvā.e haiñ ashjār qaisar-bāġh meñ

ab to ai rashk-e-chaman sūrat dikhānā chāhiye

nāla-kash hai andalīb-e-zār qaisar-bāġh meñ

vo na the pahlū meñ to us ne bhī kī pahlū-tahī

mujh se dil meñ dil se thā bezār qaisar-bāġh meñ

daur-e-ishrat hai ye zoroñ par haiñ mai-kash kyā 'ajab

mohtasib kī chhīn leñ dastār qaisar-bāġh meñ

aamad aamad hai salāmī ko hamāre shaah kī

haiñ javānān-e-chaman tayyār qaisar-bāġh meñ

mohtasib ke haath se tang is qadar haiñ ai 'qalaq'

aa.e haiñ nālish ko sab mai-ḳhvār qaisar-bāġh meñ

luT rahi hai daulat-e-didar qaisar-bagh mein

misl-e-gul sab ho gae zardar qaisar-bagh mein

dekhte hain yar ka paDhta hai kalima kaun kaun

jam' hain sab kafir-o-dinda qaisar-bagh mein

hum se aankh us ne laDai tewri badli ghair ne

chalte chalte rah gai talwar qaisar-bagh mein

us kaman-abru ne kin dil par nazar-andaziyan

hum pe tiron ki hui bauchhaar qaisar-bagh mein

gate hain murghan-e-gulshan peng deti hai sada

jabki jhula jhulta hai yar qaisar-bagh mein

be-KHudi chhai hui hai ye sharab-e-aish ki

mast do bahar paDe hain chaar qaisar-bagh mein

yan hawa mein hai dam-e-isa ka 'alam kya 'ajab

pae sehat nargis-e-bimar qaisar-bagh mein

main to kya hote hain gul bhi kushta-e-tegh-e-KHiram

banki tirchhi chalte ho raftar qaisar-bagh mein

jalwa-afgan nur ke hain phul phal tuba ki tarf

KHuld se mangwae hain ashjar qaisar-bagh mein

ab to ai rashk-e-chaman surat dikhana chahiye

nala-kash hai andalib-e-zar qaisar-bagh mein

wo na the pahlu mein to us ne bhi ki pahlu-tahi

mujh se dil mein dil se tha bezar qaisar-bagh mein

daur-e-ishrat hai ye zoron par hain mai-kash kya 'ajab

mohtasib ki chhin len dastar qaisar-bagh mein

aamad aamad hai salami ko hamare shah ki

hain jawanan-e-chaman tayyar qaisar-bagh mein

mohtasib ke hath se tang is qadar hain ai 'qalaq'

aae hain nalish ko sab mai-KHwar qaisar-bagh mein