lu ke mausam mein bahaaron ki hawa mangte hain

lū ke mausam meñ bahāroñ kī havā māñgte haiñ

ham kaf-e-dast-e-ḳhizāñ par bhī hinā māñgte haiñ

ham-nashīñ sāda-dilī-hā-e-tamannā mat pūchh

be-vafāoñ se vafāoñ kā sila māñgte haiñ

kaash kar lete kabhī ka.aba-e-dil kā bhī tavāf

vo jo patthar ke makānoñ se ḳhudā māñgte haiñ

jis meñ ho satvat-e-shāhīn kī parvāz kā rañg

lab-e-shā.ir se vo bulbul kī navā māñgte haiñ

taaki duniyā pe khule un kā fareb-e-insāf

be-ḳhatā ho ke ḳhatāoñ kī sazā māñgte haiñ

tīrgī jitnī baḌhe husn ho afzūñ terā

kahkashāñ maañg meñ māthe pe ziyā māñgte haiñ

ye hai vāraftagī-e-shauq kā aalam 'sardār'

bārish-e-sañg hai aur bād-e-sabā māñgte haiñ

lu ke mausam mein bahaaron ki hawa mangte hain

hum kaf-e-dast-e-KHizan par bhi hina mangte hain

ham-nashin sada-dili-ha-e-tamanna mat puchh

be-wafaon se wafaon ka sila mangte hain

kash kar lete kabhi kaba-e-dil ka bhi tawaf

wo jo patthar ke makanon se KHuda mangte hain

jis mein ho satwat-e-shahin ki parwaz ka rang

lab-e-shair se wo bulbul ki nawa mangte hain

taki duniya pe khule un ka fareb-e-insaf

be-KHata ho ke KHataon ki saza mangte hain

tirgi jitni baDhe husn ho afzun tera

kahkashan mang mein mathe pe ziya mangte hain

ye hai waraftagi-e-shauq ka aalam 'sardar'

barish-e-sang hai aur baad-e-saba mangte hain