mah-e-nau parda-e-sahab mein hai

māh-e-nau parda-e-sahāb meñ hai

yā ki abrū koī naqāb meñ hai

rañgat us ruḳh kī gul ne paa.ī hai

aur pasīne kī bū gulāb meñ hai

aaj saaqī shikār khelegā

bat-e-mai kāñsa-e-sharāb meñ hai

tūl-e-roz-e-firāq kahtā hai

hashr kā roz kis hisāb meñ hai

sharbat-e-qand kī sī shīrīnī

dahan-e-yār ke luaab meñ hai

shaan se kuchh bigaḌ ga.ī shāyad

zulf-e-shab-rañg pech-o-tāb meñ hai

ho 'saḳhī' ko na fikr yā allāh

arz itnī terī janāb meñ hai

mah-e-nau parda-e-sahab mein hai

ya ki abru koi naqab mein hai

rangat us ruKH ki gul ne pai hai

aur pasine ki bu gulab mein hai

aaj saqi shikar khelega

bat-e-mai kansa-e-sharab mein hai

tul-e-roz-e-firaq kahta hai

hashr ka roz kis hisab mein hai

sharbat-e-qand ki si shirini

dahan-e-yar ke luab mein hai

shan se kuchh bigaD gai shayad

zulf-e-shab-rang pech-o-tab mein hai

ho 'saKHi' ko na fikr ya allah

arz itni teri janab mein hai