mana wo ek KHwab tha dhoka nazar ka tha

maanā vo ek ḳhvāb thā dhokā nazar kā thā

us bevafā se rabt magar umr-bhar kā thā

ḳhushbū kī chand mast lakīreñ ubhār kar

lauTā udhar havā kā vo jhoñkā jidhar kā thā

niklā vo baar baar ghaTāoñ kī oT se

us se muāmlā to faqat ik nazar kā thā

tum muskurā rahe the to shab saath saath thī

aañsū gire the jis pe vo dāman sahar kā thā

ham aaj bhī ḳhud apne hī saa.e meñ ghir ga.e

sar meñ hamāre aaj bhī saudā safar kā thā

sahrā ke sar kī maañg hai ab tak vo ik lakīr

hāsil jise ġhurūr tirī rahguzar kā thā

kaalī kiran ye guñg sadāoñ ke dā.ere

pahuñchā kahāñ 'rashīd' irāda kidhar kā thā

mana wo ek KHwab tha dhoka nazar ka tha

us bewafa se rabt magar umr-bhar ka tha

KHushbu ki chand mast lakiren ubhaar kar

lauTa udhar hawa ka wo jhonka jidhar ka tha

nikla wo bar bar ghaTaon ki oT se

us se muamla to faqat ek nazar ka tha

tum muskura rahe the to shab sath sath thi

aansu gire the jis pe wo daman sahar ka tha

hum aaj bhi KHud apne hi sae mein ghir gae

sar mein hamare aaj bhi sauda safar ka tha

sahra ke sar ki mang hai ab tak wo ek lakir

hasil jise ghurur teri rahguzar ka tha

kali kiran ye gung sadaon ke daere

pahuncha kahan 'rashid' irada kidhar ka tha