mah-ruKH jo gharon se kabhi bahar nikal aae

mah-ruḳh jo gharoñ se kabhī bāhar nikal aa.e

pas-manzar-e-shab se ka.ī manzar nikal aa.e

tum apnī zabānoñ se use chāTte rahnā

kyā jāniye dīvār meñ kab dar nikal aa.e

kyā un ko Dubo.e kisī dariyā kī ravānī

ye shahr to kuuze ke samundar nikal aa.e

din bhar to rahe mahr-e-jahāñ-tāb kī sūrat

jab raat paḌī bhes badal kar nikal aa.e

aa.e haiñ agarche ka.ī chehroñ se ulajh kar

lagtā hai ki ham aañkh bachā kar nikal aa.e

āvāz to do partav-e-mahtāb ko 'tābish'

mumkin hai vo tālāb se bāhar nikal aa.e

mah-ruKH jo gharon se kabhi bahar nikal aae

pas-manzar-e-shab se kai manzar nikal aae

tum apni zabanon se use chaTte rahna

kya jaaniye diwar mein kab dar nikal aae

kya un ko Duboe kisi dariya ki rawani

ye shahr to kuze ke samundar nikal aae

din bhar to rahe mahr-e-jahan-tab ki surat

jab raat paDi bhes badal kar nikal aae

aae hain agarche kai chehron se ulajh kar

lagta hai ki hum aankh bacha kar nikal aae

aawaz to do partaw-e-mahtab ko 'tabish'

mumkin hai wo talab se bahar nikal aae