mahakti aankhon mein socha tha KHwab utrenge

mahaktī āñkhoñ meñ sochā thā ḳhvāb utreñge

patā na thā ki yahāñ bhī azaab utreñge

fareb khā.egī har baar merī tishna-labī

badan ke dasht pe jab jab sarāb utreñge

mirī lahad pe na raushan kare charāġh koī

ye vo jagah hai jahāñ āftāb utreñge

safed-poshoñ kī kab tak chhupeñgī kartūteñ

ki dhīre dhīre sabhī ke naqāb utreñge

nazar jamā.e haiñ dahlīz-e-intizār pe ham

farāz-e-ka.aba se izzat-ma.āb utreñge

gunāh lagtī hai ulfat tumheñ to lagne do

ye vo gunāh hai jis par savāb utreñge

tamām hogī tabhī to kitāb-e-zīst 'razā'

ġham-e-hayāt ke jab intisāb utreñge

mahakti aankhon mein socha tha KHwab utrenge

pata na tha ki yahan bhi azab utrenge

fareb khaegi har bar meri tishna-labi

badan ke dasht pe jab jab sarab utrenge

meri lahad pe na raushan kare charagh koi

ye wo jagah hai jahan aaftab utrenge

safed-poshon ki kab tak chhupengi kartuten

ki dhire dhire sabhi ke naqab utrenge

nazar jamae hain dahliz-e-intizar pe hum

faraaz-e-kaba se izzat-maab utrenge

gunah lagti hai ulfat tumhein to lagne do

ye wo gunah hai jis par sawab utrenge

tamam hogi tabhi to kitab-e-zist 'raza'

gham-e-hayat ke jab intisab utrenge