mahrumiyat pe kis liye karte ho tum qalaq

mahrūmiyat pe kis liye karte ho tum qalaq

ab baḌh ke chhīn lenā hai zālim se apnā haq

mere ḳhilāf kahtā hai jo kuchh bhī vo kabhī

har lafz us kā hotā hai ḳhud us pe muntabaq

sāda-mizāj rakhtī hai merī har ik ġhazal

hotā nahīñ hai sheroñ meñ ik lafz bhī adaq

vo muskurā uThe to mujhe is tarah lagā

chehre pe jaise aa ga.ī rangīnī-e-shafaq

sho.ale ta.assubāt ke bhaḌkā rahe haiñ vo

nafrat kī pāThshāla meñ lete haiñ jo sabaq

likkhā hai un kā naam baḌe ehtirām se

apnī bayāz-e-dil kā hai raushan har ik varaq

e.ajāz ye bhī dekhā hai ahal-e-jahān ne

angusht ke ishāre qamar ho gayā thā shaq

ā.īna apne sher ko karne lagā huuñ maiñ

chehra mire harīf kā hone lagā hai faq

phir dhuup se paḌegā mujhe vāsta 'sa.īd'

merī nazar ke aage hai sahrā-e-laqq-o-daq

mahrumiyat pe kis liye karte ho tum qalaq

ab baDh ke chhin lena hai zalim se apna haq

mere KHilaf kahta hai jo kuchh bhi wo kabhi

har lafz us ka hota hai KHud us pe muntabaq

sada-mizaj rakhti hai meri har ek ghazal

hota nahin hai sheron mein ek lafz bhi adaq

wo muskura uThe to mujhe is tarah laga

chehre pe jaise aa gai rangini-e-shafaq

shoale tassubaat ke bhaDka rahe hain wo

nafrat ki paThshaala mein lete hain jo sabaq

likkha hai un ka nam baDe ehtiram se

apni bayaz-e-dil ka hai raushan har ek waraq

eajaz ye bhi dekha hai ahal-e-jahan ne

angusht ke ishaare qamar ho gaya tha shaq

aaina apne sher ko karne laga hun main

chehra mere harif ka hone laga hai faq

phir dhup se paDega mujhe wasta 'said'

meri nazar ke aage hai sahra-e-laqq-o-daq