mai-e-kausar ka asar chashm-e-siyah-fam mein hai

mai-e-kausar kā asar chashm-e-siyah-fām meñ hai

sāqī-e-mast ajab kaif tire jaam meñ hai

dekhiye faisla-e-yās-o-tamannā kyā ho

sub.h-e-mahshar kī jhalak tīrgi-e-shām meñ hai

nigah-e-mast kā phir zohd-shikan duur chale

phir Dhale bāda-e-sarjosh jo is jaam meñ hai

chhā ga.e sheva-e-bedād pe dilkash naġhme

maiñ qafas meñ huuñ ki sayyād mire daam meñ hai

mutma.in ḳhud hī nahīñ phir asar-andāz ho kyā

pand-e-vā.iz abhī andesha-e-anjām meñ hai

aarzū lutf talab ishq sarāsar nākām

mubtalā zindagi-e-dil inhīñ auhām meñ hai

mai-e-kausar ka asar chashm-e-siyah-fam mein hai

saqi-e-mast ajab kaif tere jam mein hai

dekhiye faisla-e-yas-o-tamanna kya ho

subh-e-mahshar ki jhalak tirgi-e-sham mein hai

nigah-e-mast ka phir zohd-shikan dur chale

phir Dhale baada-e-sarjosh jo is jam mein hai

chha gae shewa-e-bedad pe dilkash naghme

main qafas mein hun ki sayyaad mere dam mein hai

mutmain KHud hi nahin phir asar-andaz ho kya

pand-e-waiz abhi andesha-e-anjam mein hai

aarzu lutf talab ishq sarasar nakaam

mubtala zindagi-e-dil inhin auham mein hai