mai rahe mina rahe gardish mein paimana rahe

mai rahe miinā rahe gardish meñ paimāna rahe

mere saaqī tū rahe ābād mai-ḳhāna rahe

hashr bhī to ho chukā ruḳh se nahīñ miTtī naqāb

had bhī āḳhir kuchh hai kab tak koī dīvāna rahe

kuchh nahīñ ham dil-jaloñ kī be-qarārī kuchh nahīñ

terī mahfil vo hai jis meñ sham-e-parvāna rahe

gore hāthoñ meñ bane chauḌī ḳhat-e-sāġhar kā aks

tere dast-e-nāz meñ nāzuk sā paimāna rahe

kam se kam itnā asar ho jo sune aa jaa.e niiñd

bekasoñ kī maut kā hoñThoñ par afsāna rahe

raat jo jā baiThte haiñ roz ham majnūñ ke paas

pahle an-ban rah chukī hai ab to yārāna rahe

hashr ho tum sharm ke putle na banñā hashr meñ

chaal iThlā.ī huī andāz mastāna rahe

taab us kī lā nahīñ sakte kabhī nāzuk dimāġh

baar sar hai duur sar se taaj shāhāna rahe

un ke kahne se kabhī yuuñ kah liye do-chār sher

rāt-din fikr-e-suḳhan meñ koī dīvāna rahe

un butoñ ke chalte ham ne dil ko patthar kar liyā

but rahe koī na yārab koī but-ḳhāna rahe

tuur par aa maiñ na mere sāmne yūñhī sahī

haañ zarā tarz-e-takallum be-hijābāna rahe

zindagī kā lutf hai uḌtī rahe har-dam 'riyāz'

ham hoñ shīshe kī parī ho ghar parī-ḳhāna rahe

mai rahe mina rahe gardish mein paimana rahe

mere saqi tu rahe aabaad mai-KHana rahe

hashr bhi to ho chuka ruKH se nahin miTti naqab

had bhi aaKHir kuchh hai kab tak koi diwana rahe

kuchh nahin hum dil-jalon ki be-qarari kuchh nahin

teri mahfil wo hai jis mein sham-e-parwana rahe

gore hathon mein bane chauDi KHat-e-saghar ka aks

tere dast-e-naz mein nazuk sa paimana rahe

kam se kam itna asar ho jo sune aa jae nind

bekason ki maut ka honThon par afsana rahe

raat jo ja baiThte hain roz hum majnun ke pas

pahle an-ban rah chuki hai ab to yarana rahe

hashr ho tum sharm ke putle na banna hashr mein

chaal iThlai hui andaz mastana rahe

tab us ki la nahin sakte kabhi nazuk dimagh

bar sar hai dur sar se taj shahana rahe

un ke kahne se kabhi yun kah liye do-chaar sher

raat-din fikr-e-suKHan mein koi diwana rahe

un buton ke chalte hum ne dil ko patthar kar liya

but rahe koi na yarab koi but-KHana rahe

tur par aa main na mere samne yunhi sahi

han zara tarz-e-takallum be-hijabana rahe

zindagi ka lutf hai uDti rahe har-dam 'riyaz'

hum hon shishe ki pari ho ghar pari-KHana rahe