main apne aap se ek khel karne wala hun

maiñ apne aap se ik khel karne vaalā huuñ

sabhī ye soch rahe haiñ ki marne vaalā huuñ

kisī kī yaad kā mahtāb Dūbne ko hai

maiñ phir se shab kī tahoñ meñ utarne vaalā huuñ

sameT lo mujhe apnī sadā ke halqoñ meñ

maiñ ḳhāmushī kī havā se bikharne vaalā huuñ

mujhe Dubone kā manzar hasīn thā lekin

hasīn-tar hai ye manzar ubharne vaalā huuñ

hayāt farz thī yā qarz kaTne vaalī hai

maiñ jism o jaañ kī hadoñ se guzarne vaalā huuñ

maiñ saath le ke chalūñgā tumheñ ai ham-safaro

maiñ tum se aage huuñ lekin Thaharne vaalā huuñ

sadā-e-dasht sahī merī zindagī 'āzād'

ḳhalā-e-dasht ko apne se bharne vaalā huuñ

main apne aap se ek khel karne wala hun

sabhi ye soch rahe hain ki marne wala hun

kisi ki yaad ka mahtab Dubne ko hai

main phir se shab ki tahon mein utarne wala hun

sameT lo mujhe apni sada ke halqon mein

main KHamushi ki hawa se bikharne wala hun

mujhe Dubone ka manzar hasin tha lekin

hasin-tar hai ye manzar ubharne wala hun

hayat farz thi ya qarz kaTne wali hai

main jism o jaan ki hadon se guzarne wala hun

main sath le ke chalunga tumhein ai ham-safaro

main tum se aage hun lekin Thaharne wala hun

sada-e-dasht sahi meri zindagi 'azad'

KHala-e-dasht ko apne se bharne wala hun