main birha ki nar jise har pani ras nahin

maiñ birhā kī naar jise har paanī raas nahīñ

tū ThanDā mīThā hai lekin mujh ko pyaas nahīñ

yuuñ sunte haiñ jaise ḳhvāboñ kī āvāz ho tum

yuuñ baiThe haiñ baiThe hone kā ehsās nahīñ

saare sikkoñ par hai donoñ jānib terā naqsh

aise meñ to jhagḌā hī mumkin hai toss nahīñ

koī jaan se pyārā rishta jab āzār bane

bas thoḌā sā nāḳhun kaaTā jaa.e maas nahīñ

maiñ ne baaġh lagāyā is meñ phuul aur phal to haiñ

duniyā ke talve sahlāne vaalī ghaas nahīñ

koī dhaḌkan jaisā shaḳhs achānak chhoḌe saath

ġhussa kar lenā par apne dil kā naas nahīñ

tū hai mere dil se lipTī phūloñ vaalī bel

ḳhushbū jaisī beTī tū ummīd hai yaas nahīñ

in aadhī bātoñ ne puure sher banā.e haiñ

ab jin ke baqiyā aadhe kī bilkul aas nahīñ

himmat hai to hijrat kar is duniyā-dārī se

ghar ko jañgal kar denā koī ban-bās nahīñ

har ḳhushbū ko un par zaa.e.a hote dekhā hai

jin kī qismat meñ apnī miTTī kī baas nahīñ

ye jo andar girāte rahte haiñ in ko bāñdh

duniyā vo haDDī hai jis par koī maas nahīñ

is lafzī sairābī ko bebas kī chīḳh samajh

kuchh pyāsoñ ko kahnā paḌ jaatā hai pyaas nahīñ

main birha ki nar jise har pani ras nahin

tu ThanDa miTha hai lekin mujh ko pyas nahin

yun sunte hain jaise KHwabon ki aawaz ho tum

yun baiThe hain baiThe hone ka ehsas nahin

sare sikkon par hai donon jaanib tera naqsh

aise mein to jhagDa hi mumkin hai toss nahin

koi jaan se pyara rishta jab aazar bane

bas thoDa sa naKHun kaTa jae mas nahin

main ne bagh lagaya is mein phul aur phal to hain

duniya ke talwe sahlane wali ghas nahin

koi dhaDkan jaisa shaKHs achanak chhoDe sath

ghussa kar lena par apne dil ka nas nahin

tu hai mere dil se lipTi phulon wali bel

KHushbu jaisi beTi tu ummid hai yas nahin

in aadhi baaton ne pure sher banae hain

ab jin ke baqiya aadhe ki bilkul aas nahin

himmat hai to hijrat kar is duniya-dari se

ghar ko jangal kar dena koi ban-bas nahin

har KHushbu ko un par zaea hote dekha hai

jin ki qismat mein apni miTTi ki bas nahin

ye jo andar giraate rahte hain in ko bandh

duniya wo haDDi hai jis par koi mas nahin

is lafzi sairabi ko bebas ki chiKH samajh

kuchh pyason ko kahna paD jata hai pyas nahin