main chup rahun to goya ranj-o-gham-e-nihan hun

maiñ chup rahūñ to goyā ranj-o-ġham-e-nihāñ huuñ

bolūñ to sar se pā tak hasrat kī dāstāñ huuñ

masrūr ho tū mujh se maiñ tujh se shādmāñ huuñ

tū merā mehmāñ ho maiñ terā mezbāñ huuñ

kahtī hai un kī mastī hosh aa.e to maiñ pūchhūñ

ai be-ḳhudī batā de is vaqt maiñ kahāñ huuñ

irshād par nazar hai ḳhāmosh huuñ ki goyā

chāho to be-zabāñ huuñ chāho to bā-zabāñ huuñ

jaañ ghul chukī hai ġham meñ ik tan hai vo bhī mohmal

ma.anī nahīñ haiñ bilkul mujh meñ agar bayāñ huuñ

maiñ huuñ junūñ ke hāthoñ maḳhlūq kā tamāsha

nā-mehrbāñ huuñ ḳhud par duniyā pe mehrbāñ huuñ

allāh-re us kī chaukhaT hai bosa-gāh-e-ālam

kahtā hai sañg-e-asvad maiñ sañg-e-āstāñ huuñ

kahtā hai merā naala lab tak maiñ aate aate

sau jā thamā huuñ rah meñ is darja nā-tavāñ huuñ

nafrat ho jis ko mujh se milne kā us se hāsil

nazroñ meñ kyuuñ subuk huuñ ḳhātir pe kyuuñ girāñ huuñ

muddat meñ tum mile ho kyuuñ zikr-e-ġhair aa.e

maiñ apne saa.e se bhī ḳhalvat meñ bad-gumāñ huuñ

chup rah gayā payāmī lekin ye ḳhair guzrī

ḳhat ne kahā ki suniye 'parvīñ' kī maiñ zabāñ huuñ

main chup rahun to goya ranj-o-gham-e-nihan hun

bolun to sar se pa tak hasrat ki dastan hun

masrur ho tu mujh se main tujh se shadman hun

tu mera mehman ho main tera mezban hun

kahti hai un ki masti hosh aae to main puchhun

ai be-KHudi bata de is waqt main kahan hun

irshad par nazar hai KHamosh hun ki goya

chaho to be-zaban hun chaho to ba-zaban hun

jaan ghul chuki hai gham mein ek tan hai wo bhi mohmal

mani nahin hain bilkul mujh mein agar bayan hun

main hun junun ke hathon maKHluq ka tamasha

na-mehrban hun KHud par duniya pe mehrban hun

allah-re us ki chaukhaT hai bosa-gah-e-alam

kahta hai sang-e-aswad main sang-e-astan hun

kahta hai mera nala lab tak main aate aate

sau ja thama hun rah mein is darja na-tawan hun

nafrat ho jis ko mujh se milne ka us se hasil

nazron mein kyun subuk hun KHatir pe kyun giran hun

muddat mein tum mile ho kyun zikr-e-ghair aae

main apne sae se bhi KHalwat mein bad-guman hun

chup rah gaya payami lekin ye KHair guzri

KHat ne kaha ki suniye 'parwin' ki main zaban hun