main der se dhup mein khaDa hun

maiñ der se dhuup meñ khaḌā huuñ

saaya saaya pukārtā huuñ

sonā huuñ kured kar to dekho

miTTī meñ dabā huā paḌā huuñ

le mujh ko sambhāl gardish-e-vaqt

TuuTā huā terā ā.īna huuñ

yuuñ rabt to hai nashāt se bhī

dar-asal maiñ ġham se āshnā huuñ

sohbat meñ guloñ kī maiñ bhī rah kar

kāñToñ kī zabāñ samajh gayā huuñ

dushman ho koī ki dost merā

har ek ke haq meñ maiñ duā huuñ

kyuuñ āb-e-hayāt ko maiñ tarsūñ

maiñ zahr-e-hayāt pī chukā huuñ

taqdīr-e-junūñ pe chup rahā maiñ

ta.abīr-e-junūñ pe ro rahā huuñ

har ahd ke log mujh se nā-ḳhush

har ahd meñ ḳhvāb dekhtā huuñ

main der se dhup mein khaDa hun

saya saya pukarta hun

sona hun kured kar to dekho

miTTi mein daba hua paDa hun

le mujh ko sambhaal gardish-e-waqt

TuTa hua tera aaina hun

yun rabt to hai nashat se bhi

dar-asal main gham se aashna hun

sohbat mein gulon ki main bhi rah kar

kanTon ki zaban samajh gaya hun

dushman ho koi ki dost mera

har ek ke haq mein main dua hun

kyun aab-e-hayat ko main tarsun

main zahr-e-hayat pi chuka hun

taqdir-e-junun pe chup raha main

tabir-e-junun pe ro raha hun

har ahd ke log mujh se na-KHush

har ahd mein KHwab dekhta hun