main gum hun aap apni justuju mein bhare hue rup rang-o-bu ka

maiñ gum huuñ aap apnī justujū meñ bhare hue ruup rang-o-bū kā

zavāl kī mere dāstāñ hai jise fasāna kaheñ numū kā

tumhārī gar justujū na karte to ham jahāñ the vahīñ pe tum the

ham apnī manzil se baḌh ga.e haiñ burā ho is zauq-e-justujū kā

mirī mohabbat kī intihā thī mire taḳhayyul kī but-tarāshī

bikhar ga.ī aarzū kī pūñjī tilism TuuTā jo rang-o-bū kā

talab ke sahrā kā zarra-zarra hai ḳhanda-zan sa.ī-e-rā.egāñ par

sulā de ab ai nasīm-e-ġhaflat ki thak gayā paañv justujū kā

tirī tamanna na sah sakegī malāmat-e-sharm-e-nā-rasā.ī

ḳhud apne dāman ko tū jhukā de ki thaam le haath aarzū kā

balā huī ham ko apnī jur.at agarche haqdār bhī hamīñ the

churā ke le aa.e mai-kade se jo baar uThne lagā subū kā

tumhī kaho kyā ye sach nahīñ hai ki tum ne chāhā to ham ne chāhā

hamārā sajda to ik karishma hai iltifāt-e-bahāna-jū kā

libās jo zindagī ne baḳhshā use kiyā ham ne pāra-pāra

hamārī dīvāngī ko 'rizvī' ishāra kaafī thā ek hū kā

main gum hun aap apni justuju mein bhare hue rup rang-o-bu ka

zawal ki mere dastan hai jise fasana kahen numu ka

tumhaari gar justuju na karte to hum jahan the wahin pe tum the

hum apni manzil se baDh gae hain bura ho is zauq-e-justuju ka

meri mohabbat ki intiha thi mere taKHayyul ki but-tarashi

bikhar gai aarzu ki punji tilism TuTa jo rang-o-bu ka

talab ke sahra ka zarra-zarra hai KHanda-zan sai-e-raegan par

sula de ab ai nasim-e-ghaflat ki thak gaya panw justuju ka

teri tamanna na sah sakegi malamat-e-sharm-e-na-rasai

KHud apne daman ko tu jhuka de ki tham le hath aarzu ka

bala hui hum ko apni jurat agarche haqdar bhi hamin the

chura ke le aae mai-kade se jo bar uThne laga subu ka

tumhi kaho kya ye sach nahin hai ki tum ne chaha to hum ne chaha

hamara sajda to ek karishma hai iltifat-e-bahana-ju ka

libas jo zindagi ne baKHsha use kiya hum ne para-para

hamari diwangi ko 'rizwi' ishaara kafi tha ek hu ka