main ek KHwab ko jagmagate hue dekhta hun

maiñ ik ḳhvāb ko jagmagāte hue dekhtā huuñ

diyā ik diye se jalāte hue dekhtā huuñ

kabhī surḳh phūloñ se maiñ apnī poreñ jalā kar

sharāroñ ko malhār gaate hue dekhtā huuñ

havā jab kabhī sāhilī giit chheḌe hue ho

maiñ pattoñ ko taalī bajāte hue dekhtā huuñ

sulagtī huī ret par hoñT rakhtā huā maiñ

samundar sā ik jhilmilāte hue dekhtā huuñ

kabhī maiñ use chādar-e-abr par nāḳhunoñ se

musalsal sitāre banāte hue dekhtā huuñ

kabhī us kī maujoñ meñ aflāk bahte mile haiñ

kabhī us ko kashtī chalāte hue dekhtā huuñ

vo paanī meñ jab apnī chhab dekhtā hai to maiñ bhī

nadī chāñdnī meñ nahāte hue dekhtā huuñ

nadī ke udhar ek be-ant manzar hai jis meñ

maiñ har shai ko 'at.har' samāte hue dekhtā huuñ

main ek KHwab ko jagmagate hue dekhta hun

diya ek diye se jalate hue dekhta hun

kabhi surKH phulon se main apni poren jala kar

shararon ko malhaar gate hue dekhta hun

hawa jab kabhi sahili git chheDe hue ho

main patton ko tali bajate hue dekhta hun

sulagti hui ret par honT rakhta hua main

samundar sa ek jhilmilate hue dekhta hun

kabhi main use chadar-e-abr par naKHunon se

musalsal sitare banate hue dekhta hun

kabhi us ki maujon mein aflak bahte mile hain

kabhi us ko kashti chalate hue dekhta hun

wo pani mein jab apni chhab dekhta hai to main bhi

nadi chandni mein nahate hue dekhta hun

nadi ke udhar ek be-ant manzar hai jis mein

main har shai ko 'athar' samate hue dekhta hun