main kisi shaKHs se bezar nahin ho sakta

maiñ kisī shaḳhs se bezār nahīñ ho saktā

ek zarra bhī to be-kār nahīñ ho saktā

is qadar pyaar hai insāñ kī ḳhatāoñ se mujhe

ki farishta mirā me.aar nahīñ ho saktā

ai ḳhudā phir ye jahannam kā tamāshā kiyā hai

terā shahkār to finnār nahīñ ho saktā

ai haqīqat ko faqat ḳhvāb samajhne vaale

tū kabhī sāhab-e-asrār nahīñ ho saktā

tū ki ik mauja-e-nik.hat se bhī chauñk uThtā hai

hashr aatā hai to bedār nahīñ ho saktā

sar-e-dīvār ye kyuuñ nirḳh kī takrār huī

ghar kā āñgan kabhī bāzār nahīñ ho saktā

raakh sī majlis-e-aqvām kī chuTkī meñ hai kyā

kuchh bhī ho ye mirā pindār nahīñ ho saktā

is haqīqat ko samajhne meñ luTāyā kyā kuchh

merā dushman mirā ġham-ḳhvār nahīñ ho saktā

maiñ ne bhejā tujhe aivān-e-hukūmat meñ magar

ab to barsoñ tirā dīdār nahīñ ho saktā

tīrgī chāhe sitāroñ kī sifārish laa.e

raat se mujh ko sarokār nahīñ ho saktā

vo jo sheroñ meñ hai ik shai pas-e-alfāz 'nadīm'

us kā alfāz meñ iz.hār nahīñ ho saktā

main kisi shaKHs se bezar nahin ho sakta

ek zarra bhi to be-kar nahin ho sakta

is qadar pyar hai insan ki KHataon se mujhe

ki farishta mera mear nahin ho sakta

ai KHuda phir ye jahannam ka tamasha kiya hai

tera shahkar to finnar nahin ho sakta

ai haqiqat ko faqat KHwab samajhne wale

tu kabhi sahab-e-asrar nahin ho sakta

tu ki ek mauja-e-nikhat se bhi chaunk uThta hai

hashr aata hai to bedar nahin ho sakta

sar-e-diwar ye kyun nirKH ki takrar hui

ghar ka aangan kabhi bazar nahin ho sakta

rakh si majlis-e-aqwam ki chuTki mein hai kya

kuchh bhi ho ye mera pindar nahin ho sakta

is haqiqat ko samajhne mein luTaya kya kuchh

mera dushman mera gham-KHwar nahin ho sakta

main ne bheja tujhe aiwan-e-hukumat mein magar

ab to barson tera didar nahin ho sakta

tirgi chahe sitaron ki sifarish lae

raat se mujh ko sarokar nahin ho sakta

wo jo sheron mein hai ek shai pas-e-alfaz 'nadim'

us ka alfaz mein izhaar nahin ho sakta