main kitna tanha hun koi meri zaban samjhe na baat samjhe

maiñ kitnā tanhā huuñ koī merī zabān samjhe na baat samjhe

na mere din ko vo din hī maane na raat ko merī raat samjhe

maiñ jis ko apnā samajh ke lams-e-hayāt detā rahā ḳhushī se

vo mujh ko misl-e-habāb maane karāmat-e-be-sabāt samjhe

ye sar-zamīñ ḳhushnumā hai is meñ bahut se koh-o-daman haiñ lekin

koī hazārā kahe use kyoñ koī use kyoñ savāt samjhe

maiñ kaise mānūñ jo dard kī mai kashīd kar ke pilā.e har pal

vo mujh ko har saañs ziist maane aur apnī kul kā.enāt samjhe

kisī ko kyā ab batā.eñ 'āsim' ki zindagī marg-e-mustaqil hai

vahāñ ye bhī siskiyāñ sunī ham ne jis ko shahr-e-hayāt samjhe

main kitna tanha hun koi meri zaban samjhe na baat samjhe

na mere din ko wo din hi mane na raat ko meri raat samjhe

main jis ko apna samajh ke lams-e-hayat deta raha KHushi se

wo mujh ko misl-e-habab mane karamat-e-be-sabaat samjhe

ye sar-zamin KHushnuma hai is mein bahut se koh-o-daman hain lekin

koi hazara kahe use kyon koi use kyon sawat samjhe

main kaise manun jo dard ki mai kashid kar ke pilae har pal

wo mujh ko har sans zist mane aur apni kul kaenat samjhe

kisi ko kya ab bataen 'asim' ki zindagi marg-e-mustaqil hai

wahan ye bhi siskiyan suni hum ne jis ko shahr-e-hayat samjhe