main na jaana tha ki tu yun be-wafa ho jaega

maiñ na jaanā thā ki tū yuuñ be-vafā ho jā.egā

āshnā ho is qadar nā-āshnā ho jā.egā

ḳhuub lagtī hai agar bad-nāmī-e-āshiq tujhe

aah kartā huuñ ki shohra jā-ba-jā ho jā.egā

gar tumhārī dil ḳhushī hai zab.h karne meñ mire

ḳhuub jī jaave to jaave aur kyā ho jā.egā

maiñ sunā hoñ tujh laboñ kā naam hī hājat-ravā

yak tabassum kar ki merā mudda.ā ho jā.egā

kyā ajab gar maiñ huā dīvāna-e-zulf-e-butāñ

gar farishta hove to un kā mubtalā ho jā.egā

maiñ tumhāre āstāne siiñ judā hone kā nahīñ

sar agar shamshīr siiñ kaT kar judā ho jā.egā

jyuuñ 'sirāj' us sham.a-rū par dil kuuñ hai milne kā shauq

farz-e-ain-e-āshiqī siiñ ab adā ho jā.egā

main na jaana tha ki tu yun be-wafa ho jaega

aashna ho is qadar na-ashna ho jaega

KHub lagti hai agar bad-nami-e-ashiq tujhe

aah karta hun ki shohra ja-ba-ja ho jaega

gar tumhaari dil KHushi hai zabh karne mein mere

KHub ji jawe to jawe aur kya ho jaega

main suna hon tujh labon ka nam hi hajat-rawa

yak tabassum kar ki mera muddaa ho jaega

kya ajab gar main hua diwana-e-zulf-e-butan

gar farishta howe to un ka mubtala ho jaega

main tumhaare aastane sin juda hone ka nahin

sar agar shamshir sin kaT kar juda ho jaega

jyun 'siraj' us shama-ru par dil kun hai milne ka shauq

farz-e-ain-e-ashiqi sin ab ada ho jaega